79 NAZİAT

  • 79:1

    Ina rantsuwa da mala'iku mãsu fisgar rãyuka (na kafirai) da ƙarfi.

  • 79:2

    Da mãsu ɗibar rãyuka (na mũminai) da sauƙi a cikin nishãɗi.

  • 79:3

    Da mãsu sauka daga sama da umurnin Allah kamar suna iyo.

  • 79:4

    Sa'an nan, su zama mãsu gaugãwa (da umurnin Allah) kamar suna tsẽre.

  • 79:5

    Sa, an nan, su kasance masu shirya gudanar da umurni.

  • 79:6

    Rãnar da mai girgiza abũbuwa (bũsar farko) zã ta kaɗa.

  • 79:7

    Mai biyar ta (bũsa ta biyu) nã biye.

  • 79:8

    Wasu zukãta, a rãnar nan, mãsu jin tsõro ne.

  • 79:9

    Alhãli idãnunsu na ƙasƙantattu.

  • 79:10

    Sunã cẽwa "Ashe lalle zã a iya mayar da mu a kan sãwunmu?

  • 79:11

    "Ashe, idan muka zama ƙasusuwa rududdugaggu?"

  • 79:12

    Suka ce: "Waccan kam kõmãwa ce, tãɓaɓɓiya!"

  • 79:13

    To, ita kam, tsãwa guda kawai ce.

  • 79:14

    Sai kawai gã su a bãyan ƙasa.

  • 79:15

    Shin, lãbãrin Mũsã ya zo maka?

  • 79:16

    A lõkacin da Ubangijinsa Ya kirãye shi, a cikin kwari mai tsarki, wato Duwã?

  • 79:17

    Ka tafi zuwa ga Fir'auna, lalle ne shi, ya ƙẽtare haddi.

  • 79:18

    "Sai ka ce masa, Kõ zã ka so ka tsarkaka.

  • 79:19

    "Kuma in shiryar da kai zuwa ga Ubangijinka domin ka ji tsoronSa?"

  • 79:20

    Sai ya nũna masa ãyar nan mafi girma.

  • 79:21

    Sai ya ƙaryata, kuma ya sãɓa (umurni),

  • 79:22

    Sa'an nan ya jũya bãya, yanã tafiya da sauri.

  • 79:23

    Sai ya yi gayya, sa'an nan ya yi kira.

  • 79:24

    Sai ya ce: "Nĩ ne Ubangijinku mafi ɗaudaka."

  • 79:25

    Sabõda haka Allah Ya kama shi, dõmin azãbar maganar ƙarshe da ta farko.

  • 79:26

    Lalle ne, a cikin wannan haƙiƙa akwai abin kula ga wanda yake tsõron Allah.

  • 79:27

    Shin, kũ ne mafi wuyar halitta ko sama? Allah Ya gina ta.

  • 79:28

    Ya ɗaukaka rufinta, sa'an nan Ya daidaita ta.

  • 79:29

    Kuma Ya duhuntar da darenta, kuma Ya fitar da hantsinta.

  • 79:30

    Kuma, ƙasa a bayan haka Ya mulmula ta.

  • 79:31

    Ya fitar da ruwanta daga gare ta da makiyãyarta.

  • 79:32

    Da duwatsu, Yã kafe ta.

  • 79:33

    Domin jiyarwa dãɗi a gare ku, kuma ga dabbõbinku.

  • 79:34

    To, idan uwar masĩfu, mafi girma, ta zo.

  • 79:35

    Rãnar da mutum zai yi tunãnin abin da ya aikata.

  • 79:36

    Kuma, a bayyana Jahĩm ga mai gani.

  • 79:37

    To, amma wanda ya yi girman kai.

  • 79:38

    Kuma, ya zãɓi rãyuwa ta kusa, (wato dũniya).

  • 79:39

    To, lalle ne Jahĩm, ita ce makõma.

  • 79:40

    Kuma, amma wanda ya ji tsõron tsayi a gaba ga Ubangijinsa, kuma ya kange kansa daga son rai.

  • 79:41

    To, lalle ne Aljanna ita ce makõma.

  • 79:42

    Sunã tambayar ka game da sa'a, wai yaushe ne matabbatarta?

  • 79:43

    Me ya haɗã ka da ambatonta?

  • 79:44

    Zuwa ga Ubangijinka ƙarshen al'amarinta yake.

  • 79:45

    Kai mai gargaɗi kawai ne ga mai tsõron ta.

  • 79:46

    Kamar sũ a rãnar da zã su gan ta, ba su zauna ba fãce a lõkacin marẽce ko hantsinsa.

Paylaş
Tweet'le